Елена Јакшиќ

,,Родена сум во уметничко семејство каде што уште од мала преку игра бев вовлечена во светот на креативноста. Различните материјали, бои и техники беа дел од моето секојдневие и постојано набљудував и учев нешто ново. Многу се пронаоѓав во играта со бои, но и во реалистичниот цртеж. Па затоа природно дојде до тоа да се запишам во Државното средно училиште за уметност и дизајн ,,Лазар Личеноски” на отсекот сликарство. Во училиштето изучувавме многу напредни техники на цртање, сликање, вајање, но и технички цртеж. Откога завршив средно во 2012 година веднаш се запишав на Факултетот за ликовни уметности во Скопје, на смерот ликовна педагогија. На овој смер изучував сликарство, графика, вајарство и педагогија, и со тоа моите способности се зголемија. Додека бев четврта година на факултет почнав да ја изучувам техниката на епоксидната смола, а потоа од 2017 почнав да изработувам накит во оваа техника како хоби. Оттогаш па навака хобито прерасна во нешто повеќе и почнав да творам под името Ателје Сиена. Парчињата накит се рачно насликани, а потоа залеани со епоксидна смола и со тоа му најдов примена на сликарството во предмети за секојдневна употреба како што се парчињата накит. Во 2019 завршив курс за графички дизајн и почнав своите дизајни да ги изработувам и комјпутерски, со тоа што ми се отворија нови можности. Сето знаење што го имам соберено до сега ми помага да ги усовршам своите дизајни и креации.”